Vincent近日喺土地註冊處發現，竹園北邨桐園樓有個高層單位喺今年八月份以一百二十五萬元登記成交，迄至上月再以一百二十萬元登記賣出，即係三個月內貶值約百分之四，帳面損手五萬元。

雖然市區公屋出現短炒蝕讓，但其實唔少新界公屋仍有炒家能夠獲利出貨，好似一向熱炒嘅粉嶺華明邨，上月錄得約四宗成交，佔五成係短炒，其中富明樓有個低層戶喺六月份分別以六十二萬同八十三點八萬元登記轉售，而上個月再以九十二萬元登記賣出，今次原業主賺幅接近一成。至於另一個添明樓中低層戶上個月以一百一十三萬元登記賣出，原業主四個月獲利二十三萬元。

新地鴨脷洲盤軟銷

○九年步入倒數階段，不過，新地（00016）依然落力為明年開售新盤做宣傳，藉以增加曝光機會。該公司繼上周為上水天巒舉行命名之後，昨日又租用紅磡海底隧道港島出口附近一幅大型物業外牆廣告牌，用作推介旗下鴨脷洲另一個新盤。Vincent見到廣告中有一個美女輕踏浪花，並以「渴望已久的臨海生活、一瞬即現」為點題，睇嚟該盤應該好快會推出。

（Vincent Lau）