危機感推動狂「踩油」

我前年去過杜拜公幹，只能用WOW WOW聲嚟形容，一個五十幾年前仲係沙漠嘅地方，今日發展到成個中環咁。五十年代有西方油公司發現杜拜蘊藏石油後收入大增。不過，杜拜統治者穆罕默德知道杜拜係阿聯酋7個酋長國中最少石油的，所以決定盡快脫離對「油元」依賴。佢嘅著作《我的願景》中講嘅故事：「喺非洲，每日早晨第一道曙光初露時，羚羊或獅子就要展開追逐，無論係羚羊或獅子，都一定要跑得比對方快先可以活命。」

有一次我有機會與杜拜金融管理局（FDIC）高層見面，我問佢係咪有呢個故事，佢反而舉咗另一個例子：「如同賽車，每次進入修理站，你落後嘅時間唔只係停留時間，因為其他車會繼續飛馳，所以唔容許隨便停落嚟。」由此可見，杜拜人都畀危機感推動向前，當然凡事唔可以太心急，彎位喺前面都踩盡油加速，最後只會車毀人亡。

競爭無處不在，「到底我嘅危機感放喺把口度，定係放喺對腳度呢？」香港人，你呢？

滙控CDS價格即抽升

恒指上周五急跌，「香港獅王」「貢獻」唔少。睇5年期信貸違約掉期（CDS）價格，滙控（00005）本來係全球銀行集團中CDS價格最低即係違約風險最低嘅銀行，但杜拜世界出事後，滙控CDS價格即刻抽高逾10%，依家升上尾二位置，違約憂慮大增，股價有乜辦法唔跌？

（大健）