買輪謹記「3個密碼」
巴黎第一天‧天氣晴朗
喺Heddy穿針引線下，孖妹可以與Isabelle Bourcier一齊參觀法興嘅Trading Floor（交易樓層），仲同佢做咗個訪問。
莉莉： Bonjour（法文：你好），香港人好鍾意買窩輪，唔知法國嘅投資者又係咪呢？
Isabelle：香港人除咗利用窩輪賺取短線利潤外，仲會留意其他金融產品，好似ETF及基金；至於歐洲市場嘅投資者普遍較傳統，將窩輪視為長線投資及對沖工具。不過，近年歐洲窩輪市場競爭好大，令窩輪種類及玩法比香港更多元化。
高妹： 香港經常舉行窩輪及牛熊證投資講座，法國又興唔興呢？
Isabelle：法國都有唔少投資講座舉行，以法興為例，每周會舉辦兩次，好似上周嘅講座就有200人參加。有時我哋會將1,000名投資者分為10個組別，希望以小團體座談會形式，令參與者有更多機會提問。
高妹： 你對衍生工具市場咁熟悉，可否分享窩輪投資秘技？
Isabelle： 記住「10」、「3」、「5」呢3個數字，「10」即係話投資窩輪嘅金額唔好超過整體本金嘅10%；「3」係指選擇一隻至少3個月先到期嘅窩輪；「5」就係指選擇行使價距離現價5%嘅窩輪，呢個就係我嘅「出發點值投資法」。
莉莉： 咁你有無試過買窩輪？
Isabelle： 冇呀！因為冇時間，加上要遵守公司嘅投資守則。買窩輪要睇實市況，投資者要隨時準備做止蝕，或者轉換另一隻窩輪，每日可能要買賣幾次，所以歐洲嘅窩輪客戶都係以退休男性居多。當我退休時，我就會去買窩輪。
港輪證成交勢續增長
巴黎第二天‧陽光充沛
Heddy喺午宴上向歐洲媒體報告，話香港已成為全球窩輪交投最活躍嘅市場。隨後，法興銀行總部特別喺泛歐證券交易所（Euronext）安排咗敲鐘儀式，慶祝法興喺法國推出窩輪20周年，孖妹有幸參與其中。
莉莉： 點解香港人咁鍾意炒窩輪？
Heddy： 一句講晒，本小利大。香港人玩熟咗一隻產品，會愈嚟愈鍾意玩。現時窩輪、牛熊證合共佔大市成交約20%，我估計明年港股走勢轉好，輪證成交比例可增至30%。
高妹： 法興喺香港做投資者教育已有10年，你有乜嘢感受？
Heddy： 最開心係見到投資者與發行商嘅關係變得和諧，佢哋會明白與我哋並唔係對賭關係，而且投資者對窩輪及牛熊證嘅玩法了解多咗，依家已經好少再有人打電話嚟喊問：「我買窩輪輸咗好多錢，我可以點做？」
拓亞洲市場瞄準韓台
莉莉： 未來香港嘅窩輪及牛熊證場市場有乜嘢發展空間？
Heddy： 香港嘅窩輪及牛熊證可以話係取長補短嘅關係，當市況差時，會有較多投資者玩牛熊證；市況正常化時，窩輪交投量又會變得活躍；由今年初至上月中，窩輪佔大市成交10.8%，牛熊證就佔10.9%，真係叮噹馬頭。講到發展出路，就要靠各大發行商研究多啲新產品。
高妹： 如何開拓亞洲其他地區嘅窩輪市場呢？
Heddy： 韓國嘅窩輪交投量已超越德國，排名僅次於香港，所以法興對開拓韓國市場甚具興趣；另外，台灣嘅交易系統做得好好，股票流通量亦足夠，只要做多啲投資者教育就得，我都希望明年能於台灣推出第一隻窩輪。至於中國市場，由於制度上未能配合，現時仍處於起步階段。
36%人估收爐穿22000
巴黎第三天‧天晴，吹微風
到咗旅程最後一日，孖妹決定去龐比度中心（Centre Pompidou）吸收藝術靈氣，行到門口就識咗個法國人Jimmy。從佢口中得知，法國人每周只需工作35個小時，就當一周返5日工，每日只係返7粒鐘，仲有好多時間享受，所以Jimmy每當放假，就最鍾意拎住支木結他，周圍去自彈自唱。
問到Jimmy有冇玩股票或窩輪，佢就話：「我本身有份工作，所以比較少投資，雖然法國房地產比較貴，但我都有買樓。不過，投資一定要小心風險，有時候更加唔可以急進。」
踏入十二月係傳統基金「粉飾櫥窗」嘅利好月份，恒指已由今年低位反彈約一倍，《東方產經》民調問股友恒指十二月會收報於甚麼水平？有36.3%股友估21,000點或以下，17.5%人估22,000點，23.9%人估23,000點，13.3%人估24,000點，只有9%估收報於25,000點或以上。
莉莉、高妹
若有料報畀高妹同莉莉或有嘢問，可電郵money.biz@opg.com.hk