杜拜世界事件雖然令各地魚缸震盪，但對本地魚缸的上市公司盈利影響微乎其微，實不能跟去年「沙煲雷」或「花旗邦」出事的時候相提並論，更遑論為金融海嘯第二波。在周末期間，阿布扎比錢莊雖表示不會將杜拜所有債務「攬上身」，但古勝相信打死不離親兄弟，阿聯酋某程度上會騰出資金支持杜拜。古勝認為上周五本地魚缸擺明患上「過敏症」，加上自三月中開始的升浪，恒指累計已翻一番，藉呢個機會進行較大幅度調整亦不為過。

要數上周五本地魚缸下半場急跌的元兇，應該係一眾衍生工具，當日多達149隻恒指牛仔被打靶，破晒紀錄，發行商為作對沖，在期貨場大手沽期指，加速大市跌勢，而當日咁啱又係期貨場結算日，吸引過多魚缸資金追逐投資工具，且發行商出品的結構產品多如天上繁星，推動波幅擴大，本地魚缸更有跌過龍之嫌。睇番上周五晚ADR表現，魚缸要回補50日線水平，即21,800點亦唔出奇，講到底都係睇大戶想點做。

憧憬重組表現硬淨

古勝仍睇好本地魚缸後市表現，上周五急插水，係難得執平貨好機會，事實上個別紅籌國企仍能逆市上升，表現出色。在魚缸插水之際，個別抗跌力強的股份，一係就有老利消息跟尾，又或孖屐憧憬重組消息，再唔係就貨源早已流入強中手。北京控股（00392）可以話同時具備上述三項條件，上周五甫開波稍為低見48.5元後，已逆市上升，最高見50元，報收49.55元。

天然氣業務動力強

北控截至○九年六月底止，營業額及股東應佔溢利分別上升21.2%及11.4%，至116.28億元及14.18億元。期內主營業務的燃氣、啤酒和污水及自來水處理業務，都能錄得理想的增幅，而整體毛利率為25.1%，亦與去年同期相若。北控成績表咁靚仔，多得資產重組完成，而核心天然氣業務則繼續成為盈利原動力，加上對相關資產潛在的收購行動，亦為投資者帶來憧憬。北控目前的負債比率低於10%，絕對有足夠資源去收購資產，更無任何集資壓力。

古勝