17/11/2009

播放本新聞相關短片
查詢股票編號

絲絲講場:滕一龍強項造船

絲絲尋日去咗會展睇「新中國船舶工業60年成就展」開幕,離遠見到上實控股(00363)董事長滕一龍覺得有啲奇怪,心諗以房地產基建為主業嘅上實,就算係母公司都同船呢行扯唔上關係,更奇嘅係滕總仲要企喺個模型潛艇側邊,同啲賓客好詳細咁講解點樣造潛艇。

曾任職船公司26年

滕總仲Pro(專業)到連潛艇氣壓狀態等都好詳細咁向賓客介紹,佢同啲賓客愈講愈開心,由潛艇講到LNG液化氣船,簡直係無所不曉。

絲絲有啲i頭,事關滕總喺入上實之前一直做緊大法官就係人都知,但點解佢除咗法律之外,連對造船都咁Pro呢?絲絲就拉住滕總要搞清楚,一問之下,先知原來滕總做大法官之前喺中國船舶工業集團旗下嘅江南造船公司一做就做咗成二十六年,唔怪得知乜船都識啦。

絲絲就問滕總究竟對法律及造船邊一瓣熟啲?佢就話做嗰瓣梗係要專嗰瓣,所以呢兩瓣對佢嚟講一啲難度都無,都係咁熟。聽完佢咁講,絲絲對滕總肅然起敬,唔怪得佢一嚟上實就喺短時間內,將上實業務重組得又快又成功啦,一句講晒,咪就係Pro囉。

余絲韻