聽講呢位Anna來頭都唔細，之前佢喺滙豐私人銀行嘅職銜係董事總經理，直接向滙豐私人銀行亞洲業務一姐Monica（王以智）匯報。

金融業年資逾廿載

雖然Anna喺滙豐做咗私人銀行唔係好耐，好似話只係超過兩年時間，但從事金融業嘅年資就有廿幾年，即係話佢起碼都經歷過八七股災、九七亞洲金融風暴、二○○○年科網股爆破、沙士一役股市大冧以及去年發生嘅金融海嘯，所以佢擁有嘅金融市場經驗應該相當豐富，由佢出任滙豐金融服務嘅CEO都可以理解，而且呢間公司啲客戶並非一般散戶，佢哋上落嘅金額都好大，所以搵喺私人銀行服侍慣貴客嘅Anna嚟招呼呢班非一般散戶亦係合情合理。

余絲韻