擁有好多電腦主機嘅恒生銀行（00011）就從呢啲細微之處達到環保目的，佢哋計過，只要早啲熄咗唔用嘅電腦主機，每年銀行可慳番嘅電費高達270萬元，同時間能減低二氧化碳排放嘅數量，相等於搭飛機來回香港上海6次咁多。

提早發出電腦關機訊息

用完電腦熄機其實只係舉手之勞，但好多打工仔都懶咁做，可能趕收工，又或者無咁嘅習慣，令部機成日處於備用狀況，既浪費電力又唔環保。恒生早前已通知員工會實施新措施，將所有桌面電腦嘅自動關機時間由過往晚上10點半，提早喺晚上7點半發出關機訊息，部機喺25分鐘後就會自動關掉（即使部機當時仍開着）。

電腦自動熄機，員工做緊嘅嘢會唔會無晒？恒生話自動關機系統喺關機前，會自動為微軟辦公室文件及記事簿文件做備份。總之為環保為省電費，用完熄機最實際。

余絲韻