本文重點
滙豐過去曾舉辦國際公路單車賽及全港單車百萬行，今年再下一城，喺香港首次舉辦國際級小輪車公開賽。絲絲收到風，平日斯斯文文嘅滙豐環球銀行常務總監兼亞太區主管范浩宏，今次親自率領滙豐單車隊成員落場，認真夠睇頭！
范浩宏率猛將奪亞軍
唔好以為身為滙豐高層嘅范浩宏係人臨時拉伕被迫參賽，絲絲聽講佢原來係單車健將一名，擁有海外比賽經驗；至於同佢一齊出賽嘅3隊滙豐單車隊合共12名成員，大部分亦擁有公路賽經驗，同屬單車猛將，難怪滙豐隊最終可進身決賽，仲勇奪亞軍添！
正所謂成功非僥倖，據知滙豐單車隊自去年中成立，至今約有30名滙豐員工參加，由前香港單車隊成員何兆麟擔任教練，一個月集訓兩次，如果有賽事要舉行，集訓次數就更頻密。隊員返朝9晚5之餘仲要集訓，都咪話唔辛苦。
有比賽又點少得啦啦隊？絲絲嗰日就見到，滙豐亞太區企業可持續發展總監區佩兒及滙豐集團總經理兼亞太區環球資本市場主管馮婉眉親身到場打氣。唔講唔知，原來馮婉眉都係滙豐單車隊成員之一，不過佢今年並無出賽，因為佢想再練習多啲先至落場。
余絲韻