Martin細路仔時已好醒目，識得自己搭地鐵周圍去，「以前住太古城，但喺觀塘讀小學，又喺旺角及牛頭角學習中國笛。」讀中四嗰年，Martin仲一個人搭飛機去英國留學寄宿，到大學畢業先返香港。

絲絲本來以為Martin實係畀父母捉去英國讀書，點知佢話係自己決定。「讀中三嗰年嘅農曆新年，同屋企人拜完神搭地鐵返屋企時，霎時間好想去外國讀書，於是就向屋企人提出。當時為趕得切喺九月開學，仲要臨急臨忙去搵學校。」去到英國後，Martin鍾意周圍走嘅性格依然冇變，期間去過奧地利及匈牙利遊覽和寫生。

投金融圈前先「充值」

至於入行經過，大學主修機械工程嘅Martin話，喺畢業前打開報紙搵工，發現相關嘅職位空缺唔多，覺得行頭偏窄，於是讀多一年保險及風險管理碩士學位，諗住之後投身金融圈。

其實Martin本身對投資好有興趣，佢話好記得細個第一次落股票行係去搵嫲嫲，當時仲用緊人手白板寫價，無依家咁先進，但佢自小已對證券行有咗概念。

余絲韻