本文重點
去年金融海嘯除咗拖累唔少企業「摺埋」之外，有好多高管一族都要減薪Cut福利，不過只要係有表現、幫到公司手嘅，一定會有回報，好似新世界（00017）董事總經理鄭家純同佢嘅乖仔兼公司執董鄭志剛咁，去年都一樣有得加人工。
根據新世界最新嘅年報顯示，截至今年六月止嘅一年，新世界管理層都有人工加，當中「純官」嘅人工由2,160萬元加到2,310萬元，升幅差唔多7個巴仙，花紅就維持不變，但由於購股權價值因為大市轉弱而縮水，所以「純官」去年總收入由3,580萬元微跌至3,440萬元。
唯冠主席減薪共渡難關
至於Adrain（鄭志剛洋名），除咗人工大升42%至400萬元外，佢去年嘅花紅仲狂升1.5倍，雖然只係50萬元，但從花紅嘅升幅睇，公司對Adrain去年嘅表現肯定非常滿意。
講開人工，剛公布去年度勁蝕29億元嘅唯冠國際（00334）尋日亦刊載年報，話主席楊榮山去年人工由3,933萬元減到3,727萬元，都算係與公司共渡難關啦。
余絲韻