本文重點
一年一度嘅京港經濟合作研討洽談會，尋日起一連兩日喺北京舉行，今次港府率領一眾金融業界代表「拉大隊」到北京，自然少不了證券經紀嘅份兒，可惜期間發生咗一段小插曲，因為政府喺一啲安排上嘅不協調，令原本熱熱鬧鬧嘅氣氛頓時變僵，有經紀業代表大發牢騷。
李耀榮無辜受累
證券學會主席張華峰今次冇上北京，但佢尋日就收到唔少喺北京嘅行家來電，向佢大吐苦水。話說今次除咗「龍頭」組織——證券業協會外，政府今次亦邀請咗五大經紀會上京，包括證券商協會、證券學會、證券及期貨業職工會、網上經紀協會、專業財經分析及評論家協會。
五大會一心諗住捧場畀面，紛紛響應，派出正副會長等出席，點知研討洽談會原來有一環節，係證券業協會主席李耀榮上台發表經紀業界對中港金融合作發展嘅意見，由於事前五大會並唔知情，而演講又話係代表業界意見，喺現場嘅五大會代表極不是味兒，有人仲提早離場，甚至揚言話可能唔出席今日嘅一啲活動。
張華峰話，佢哋唔係針對李耀榮，而係政府嘅安排實在唔協調，最少都應該事先畀佢哋知道，今次之後更加深經紀業界之間嘅分化，實在係無風起浪，佢話一定要同政府反映。
余絲韻