踏入○九年，內地煤價才較穩定，加上去年下半年兩次加電費，電企流血不止情況有緩和迹象。華電國際（01071）剛發盈喜，估計九月底止首三季可轉虧為盈。

煤價回落紓緩成本壓力係好事，不過大部分電廠發電設備使用率普遍唔高，仲可以保持發電量增長，點計都高一班，毛利改善之餘，收入又有增長，業績有雙重上升動力保障。基金愛股華潤電力（00836）剛公布九月份營運數據，售電量增加29.9%，相比首三季的8.6%升幅，意味九月單月計增長加快，消息刺激股價升0.3元，收報17.62元。

成本控制相對出色

唔講唔知，綜合大行預測，潤電估值在內地電力股中，可算數一數二，大行估潤電今年賺48億元，○九年底市盈率16.7倍，高過華電一條街，比華能（00902）的13.7倍高兩成二，亦稍高於大唐發電（00991）的16.5倍。市場評價好，同潤電往績直接有關，睇番○四年潤電營業額只係19億元左右，到○八年已經達到267.7億元，四年售電額增長十四倍！

反映潤電幾年來，透過收購，避過漫長投資期，而且主攻較富庶地區的策略十分成功，管理及成本控制上也相對出色。在高煤價下，○八年華能及華電勁蝕，大唐業績都要跌七成七，潤電只係少賺四成七，是行內之冠。有理由相信，發電機組容量經過○九年調整後，一○年會重拾增長，下半年內地出口及工業生產復甦，只要煤價平穩，潤電未來業績的反彈力度也會最強。

今年上半年情況麻麻，年中時，潤電估今年售電量有3%至5%增長，已算合格，現在九個月升8.6%，超額完成機會十分大，年中14元供股，潤電財政寬鬆，應有利準備直接收購煤礦，穩定供應的計劃。

預期一○及一一年潤電年增長達23%，目前一○年市盈率大約13.8倍，抵買指數PEG只係0.6倍，筆者相信目前股價未充分反映未來兩三年增長潛力，近期在17至18元見收集迹象，打算持貨一至兩年的，潤電應該是行業首選。

戴峰修