母企統一旗下品牌

雖然民安上市只有3年，就因為母公司嘅整合大計而私有化，股民對佢哋都唔係好熟悉，但查實民安嘅品牌屹立香江一甲子，喺保險業嘅江湖地位好高㗎！平安保險（02318）嗰名就係偷師自民安以及母公司旗下嘅太平保險，話說21年前平保成立前夕，老細馬明哲嚟香港見到「太平」及「民安」兩間保險公司，於是靈機一觸，各偷一字湊成「平安」兩字，咁先至有今日嘅平保。

咁啱太平、民安同屬於中國保險集團。依家中保正陸續統一旗下子公司嘅品牌，一律使用「太平」系列，集團上市旗艦中國太平（00966）已完成改名，聽聞民安完成私有化之後，年底前都要改名，睇嚟市場又要再適應過。

余絲韻