本文重點
大家估吓中大酒店及旅遊管理學院會計與財務高級導師李兆波（Simon）最鍾意邊個卡通人物？超人？合金機械人？佢話呢啲都鍾意，但最喜歡都係芝麻街入面橙色嘅Ernie，原因係乜？似自己夠簡單嘛！Simon話細個時家境唔算富裕，屋企冇乜公仔，依家大個咗就可隨心所欲咁買自己鍾意嘅公仔，仲放滿晒喺屋企添。
講起細個，Simon仲記得讀小學嗰時，曾經有間飲品公司到學校派飲品，全校同學仔都好開心，因當時大部分同學嘅家境都唔係太好，有免費嘢飲係好難得；仲有，聖誕聯歡時學校會派禮物包畀同學，裏面有糖、零食等，依家小朋友可能覺得冇乜特別，但Simon嗰時已經心滿意足。
始終鍾意教書多啲
Simon係工商管理碩士（MBA）畢業，喺商界打滾過，但發現都係鍾意教書多啲。投資方面，佢話自己嘅組合內雖然有七成係股票，但都係以藍籌股為主，所以都算穩健。不過，佢覺得投資最重要係保持充足現金流，減低負債，先可以經得起風浪。
余絲韻