本文重點
「變身股」凱順能源（08203）尋日宣布計劃收購東英金融有份揸嘅俄羅斯石油公司，熟悉金融界嘅都知，東英與唔少創業板公司都好好關係，原來凱順能源依家嘅主席陳立基，以前都喺東英亞洲做過，曾經被證監會暫時吊銷牌照，蟄伏多年後出番嚟做公司高層，唔怪得今次單刁搞得掂啦！
凱順前身主席變拍檔
唔單止咁，今次以東英金融合夥人身份出席嘅葉孫濱，以前亦做過多隻細價股包括明日國際（00760）、聯合能源（00467）嘅行政總裁，最緊要係葉孫濱仲做過挑戰者嘅行政總裁，而挑戰者正正就係凱順能源嘅前身，今年二月先宣布改名，今年八月凱順能源就宣布收購蒙西礦，效率真係高！
從陳立基及葉孫濱呢次嘅「移形換影」可以睇得到，香港金融圈真係話細唔細，話大都唔大。
余絲韻