中國菜啱食 利是有得派

去到答問嘅時候，絲絲以為香港地區嘅滙豐友會有乜嘢好問題問紀勤，點知佢哋原來好關心佢嘅個人嘢，好似話有人問紀勤鍾意食啲乜，佢好大方咁答，話其實乜都鍾意食，包括中國菜，仲講笑話睇吓佢嘅身形就知乜都食啦！

隨着集團行政總裁辦公室搬嚟香港，紀勤明年二月就正式常駐香港，而明年嘅農曆新年正正係二月中，與會嘅同事亦好醒目咁問紀勤會唔會派利是？紀勤就梗係話「Welcome」，屆時同事上嚟佢嘅辦公室，佢都會好識做。唔知到時有幾多同事真係夠膽去紀勤嘅大班房攞利是？又唔知呢位大班會畀幾多利是啲同事呢？

唔好以為個演說淨係圍繞佢嘅個人嘢，其實紀勤由起初做CEO時，已經好鍾意向全球同事宣布一個訊息，就係將成個集團聯繫埋一齊。佢尋日亦唔例外，都係繼續同香港嘅同事講呢個訊息，而且仲用咗好多篇幅講吓ONE HSBC，即係話要有一個共同平台，令到客戶不論身處何地都能用到相同服務，「大笨象」依家仍然向住呢個目標努力進發。

余絲韻