美股終於升穿10,000點，為市場打番支強心針，故恒指亦以升穿22,200點作為回應，大市升得咁勁，魚缸中人亦開始心雄，早幾日古晨都覺得啲股仔有番啲炒味，呢兩日發展都唔錯。內地十月份新增貸款有成五千幾億人仔，代表市場水頭仍充足，相信啲鑊鏟友好快又會埋番位。
講開炒股，近期至醒至勁首推隻比亞迪（01211），自從獲股神欽點後，股價真係脫胎換骨，可惜現價炒到天咁高，真係想追都難，相反佢個仔仔比亞迪電子（00285）就無乜點炒過。睇番佢中期業績麻麻，股價更曾因此插水，不過九月後就靜靜地起革命，唔覺唔覺都爬升咗成個幾月，尋日仲突然上晒力，似要玩爆上嘅款，現價唔算貴可以照追，向上睇5.9元上次頂位，止蝕位就定喺4元。
古晨