另外，Vincent剛剛同億京項目籌劃經理黎裕宗傾開，原來該集團喺長沙灣道九三二號嘅工廈重建項目，屬非同意紙方案，可以隨時賣樓，已經密密手累積獲預留咗差不多五成樓面，涉及超過十層樓面，平均呎價約四千餘元。另利嘉閣朱亮恒講，上個月全港工廈物業買賣登記總值突破三十四點六億元，除按月飆升百分之九十七外，仲創下逾十年新高。

代理生意增 開分行

近排樓價一路咁升，令地產代理行生意盆滿缽滿，Vincent八到，北角「地膽」世紀21日昇上月營業額約有三百萬元，比去年十月低位上升差唔多七倍，同時亦是開業四年來的單月新高。

與此同時，世紀21日昇董事黃文龍話，公司今個月剛剛在城市花園增開分行，下個月會在港運城多開一間，屆時住宅分行嘅數目共有四間，希望人手在下年之內增加近七成，至五十人；另該公司亦會在今年開設首間工商舖分行，以圖拓新錢源。

Vincent Lau