本文重點
僑豐金融董事總經理許照中一直好關心香港嘅金融發展，就連中環街市活化呢個問題，佢都好有興趣，以佢縱橫中環38年嘅經驗，絕對有資格評論，佢話保育及資源運用係魚與熊掌。佢仲好似本活字典咁，細數中環以前嘅點滴，話遠東交易所以前喺華人行，試過有太多人上去炒股，為防危險，要出動消防車驅趕人群。
尋日份施政報告話香港同上海唔係零和遊戲，許照中同意呢個睇法，話香港與上海可各自分工，況且一個國際金融中心，必須要經過時間考驗，因此上海仲有排至追得上香港。不過佢話香港亦唔可以等運到，必須要做嘢提升自己，令中央願意利用香港作為發展嘅平台。
為金融施政重整「綱領」
佢尋日連股市都暫且擱下，「咪」晒成份施政報告，尤其係金融部分。佢好有心機咁將份報告仔細分析，仲學足大陸文化，將金融嗰部分歸納成三大目標、兩大前提及五大方向。嘩！十足行動綱領咁。
大家都想知道個「綱領」係點啩？三大目標分別係香港要成為國際融資平台、資產管理及人民幣離岸中心；兩大前提係中港之間要互惠互利同維持國家金融安全；五大方向係會聚人才、利用香港作為人民幣國際化試點、金融合作採先行先試、為內地提供首選嘅融資及對沖風險平台、同加強兩地金融聯繫。
余絲韻