本文重點
睇得多「警訊」都知道，唔少壞人會冒認其他人招搖撞騙，所以做名人真係要小心啲，至於收到所謂名人電郵嘅仁兄，就要加倍留神。最近就分別有人冒名發出兩封署名係滙控（00005）執行董事兼環球銀行及資本市場業務主管歐智華，以及恒生銀行（00011）前執行董事兼財務主管陳國威嘅詐騙電郵，大家認真要小心！
笨賊唔知陳國威轉咗工
今次電郵主角之一嘅「陳國威」，查實今年上半年已轉投新地（00016），唔再係恒生高層，但封電郵竟然用番恒生嘅Title，證明呢封電郵係幾咁假，發電郵嘅人亦認真唔夠專業，係笨賊一名！
相信陳國威本人睇番呢封電郵，都認真係得啖笑，據絲絲所知，兩、三年前已經出現類似嘅詐騙電郵，當時又係呢類型匯款遊戲，完成後收件人可以分到四成。今次「交易」點樣分帳？話有商有量喎！絲絲記得當時恒生就呢件事已通知銀行保安部，亦有報警處理。
滙豐嗰邊都見過唔少呢類電郵，有時係冒認不同嘅高層，今次就輪到歐智華，滙豐行走江湖咁耐真係見怪不怪。所謂貪字得個貧，睇電視都知，呢啲騙案往往係呃你過一筆數目畀佢，話之後有得退番，結果係點？當然係賊人已逃之夭夭。絲絲呼籲大家收到呢啲電郵，唔好咁開心以為金融界名人睇中同你合作，查實係賊佬睇中你就真！
余絲韻