梁太尋日同班大專生分享多方面心得，金融、社福、理財樣樣都有講。學生們最鍾意聽大人講鬼馬嘢，劈頭第一樣嘢就問梁太當年有無做足大學生必做嘅「五件事」？

大學生「五件事」好重要

大學生最興做邊「五件事」？咪就係拍拖、上莊、住Hall、做兼職同埋讀書囉！梁太話，當年做大學生時都有做呢啲嘢，仲話「五件事」都好重要！佢仲話，當年畢業後揀入銀行界，就係因為佢本身係心多多唔知做乜嘅人，咁啱嚟大學講就業講座嘅師姐又係佢識嘅，師姐話銀行界可以涉獵嘅範圍好廣泛，正合佢口味。

偶有失意 暫離崗位冷靜

少年人踏出社會，又豈能盡如人意、一帆風順？梁太話自己都有失意時，例如自己嘅意見不被採納。遇到挫折嘅時候，梁太會先離開崗位，因為佢深信，喺嬲或者失意時做嘅決定，可能會令佢後悔一生一世。佢會選擇去做運動出一身汗，甚至試過匿埋喺教堂大喊一場，當心情平復過嚟，就會發現事情係幾咁渺小，自己唔需要動怒。所以話，退一步的確係海闊天空！

余絲韻