唔買唔批擺明要脅

銀行要求中小企買「要員保險」，保費成25萬元，保額高達75萬美元，折合差唔多成600萬港元，一間中小企頂盡都係借1,200萬元，政府都擔保咗八成啦，屈間公司買咁大份保險，咪為咗谷大條保險數囉。

現金流動性對中小企嚟講係最重要，當然有好多中小企唔肯就範，但係有銀行職員報料話，佢哋一有中小企開戶口就要啲老闆買保險同基金，如果佢哋唔肯買，隨時連中小企信貸都唔批，如果買咗，你申請借200萬元，銀行就批夠300萬元畀你。

有銀行職員都睇唔過眼，話銀行要啲老闆買「要員保險」，根本唔可以保障銀行貸款風險，只係賺多份保費，除非間中小企破產時，銀行叫個老闆「意外」跳樓，咁就有得賠嘞。

余絲韻