本文重點
新世界發展（00017）主席鄭裕彤嘅孫仔鄭志明，今年七月正式加入新創建（00659）董事局做執行董事，尋日新創建全年業績會上，拜仁（鄭志明洋名）當然有出席，不過就冇坐上台，只係靜靜哋坐喺台下。記者會完咗後拜仁即時起身諗住離開，但傳媒又點會放過佢呢？即刻捉住佢問吓做乜唔坐埋上台，拜仁就好謙虛咁話只係做咗幾個月（執董），仲有好多嘢要慢慢學，唔使咁急坐上去。
雖然拜仁入局只係短短幾個月，但新創建已有好多搞作，頻頻入股二、三線公司，上月底用五億幾入股光大國際（00257），之前亦買入中科環保（00351），七月嗰陣又入股由柯清輝任副主席嘅國際資源（01051）。
新創建沽國際資源套利
拜仁尋日就強調，公司唔係諗住炒股，而係希望投資環保基建項目，仲大讚光大國際嘅垃圾發電做得好好，所以入股。至於聯同彤叔旗下周大福一齊入飛嘅國際資源，拜仁就透露公司已沽咗一半貨，沽貨價係五毫，比起三毫半嘅入貨價，已賺超過四成，足見拜仁投資眼光唔錯噃！
余絲韻