近期思捷（00330）人事變動頻仍，歐洲經濟衰退令思捷去年度盈利倒退逾26%，絲絲尋日翻開年報，見到公司前副主席、董事兼財務總監潘祖明個名，舊年佢辭職，原來公司就畀咗2,144.5萬元嘅離職補償金，呢筆錢包括咗不競爭協議，絲絲覺得雖然比起去年佢嘅年薪3,344萬元為少，不過有過千萬退休都好。
思捷今年二月委任周福安為執董及集團財務總裁，年報顯示佢嘅酬金為566.9萬元，比潘祖明少一大截，但後者就身兼多職。
隨着公司盈利倒退，各高層花紅亦減少，好似主席高漢思嘅酬金包括花紅共少咗6%至6,825.7萬元；公司前董事兼Esprit品牌北美洲總裁Jerome Squire Griffith酬金亦大減60%至440.5萬元。新行政總裁Ronald van der Vis（范德施）由於今年先上任，薪金有157萬元，但公司已講明首年受聘有年薪150萬歐元及花紅保證100萬歐元。
余絲韻