本文重點
環球貿易廣場（ICC）上月發生嚴重工業意外，令到好多人心傷，發展商新地（00016）上上下下都唔例外，外界都認為新地管理層面對危機處理反應好快，唔單只即時向6位死難者家屬發放120萬元恩恤金，原來仲有一啲細節反映到郭炳江嘅應變好快。
換白衫尊重死者家屬
郭炳江當日見傳媒時係一身高球衣着打扮，更被部分媒體誤以為佢啱啱打完波。其實唔係，絲絲一位老友澄清，話郭炳江當日中午用膳時聽到呢個噩耗，佢第一時間諗到要先解決死者家屬嘅需要，然後再評估損失同追究意外嘅責任，正當佢思量如何面對傳媒時，卻發現自己身穿一件紅衫，中國人遇白事最忌係「穿紅掛綠」，當時傳媒十萬火急等佢回應，佢即時就換件白T恤，再加件無袖風褸見傳媒。絲絲聽到佢連呢啲小節都顧及死者家屬嘅感受，見微知著，可見佢對死者家屬嘅尊重。
余絲韻