段永基有次同絲絲食飯，佢一餐飯就叫酒樓侍應添咗兩大碟醬油，絲絲以為佢鍾意食豉油，問清楚先知係醋。於是佢就公開心得，話說有一次做健康檢查，醫生好驚訝咁發現佢嘅血管狀況比實際年齡後生至少20年，於是追問佢平時嘅飲食習慣，段總話佢無特別食啲乜嘢，但係自細就鍾意食醋，日子有功，可能就係有依家成績嘅原因。

除咗有食醋嘅習慣外，四通旗下有自家產品「腦白金」、「黃金血康」等健康產品，段永基話佢自己同埋老友聯想（00992）主席柳傳志都有食「黃金血康」，有兩位大人物做緊白老鼠，實好使得喇！

健康產品宣傳「捉蟲」？

「腦白金」喺內地廣告賣到家喻戶曉，「今年過節不收禮，收禮只收腦白金」呢句廣告對白令人印象深刻。不過據熟悉佢哋產品銷售嘅人講，原來佢哋嘅產品喺內地被視為「送禮」產品，而非健康產品，搞到產品嘅銷售量好集中喺過時過節，例如中秋節及農曆新年。不過，四通早排通過咗私有化，無論旗下產品銷唔銷得，股民以後都無機會分享。

余絲韻