本文重點
華潤集團董事長宋林之前同絲絲講過，佢哋上上下下嘅員工一齊搞緊「希望小鎮」，喺廣西搞嘅第一個「希望小鎮」已經起到七七八八嘞，正喺海南島石梅灣起緊第二個，投資總額同第一個差唔多，都係五千萬人仔，佢哋第一個希望小鎮就幫到一千五百個貧困人士，希望今次可幫到更多人，佢就心滿意足啦。
員工捐錢兼做義工
絲絲尋日喺華潤水泥（01313）嘅上市儀式遇到宋董，大家講起呢個咁有意義嘅工作，都希望多啲人知道同參與。希望小鎮呢個模式係由華潤集團首創，亦係宋董親自構思，希望透過公司同員工捐錢出嚟起呢類小鎮，由華潤創業（00291）將良種番茄同豬仔帶入去，豬仔長大及農產品收成後，再賣番畀華潤超市；華潤水泥及華潤置地（01109）就幫村民做規劃同埋起新村，就連員工都出錢出力做義工。
佢哋第一個希望小鎮係喺廣西百色永樂鄉西北樂村做試點，宋董話未來嘅目標係每個省搞一個喎。
余絲韻