本文重點
正所謂鐵打嘅衙門、流水嘅官，一間機構如果運作得好，員工點執位都唔會有大礙。好似早排富邦香港（00636）董事總經理兼行政總裁李晉頤突然宣布提早退休，聽講佢個位好快就會由現任台北富邦銀行個人金融總經理梁培華頂替。
傳梁培華來港揸弗
絲絲聽番啲台灣朋友講，話大家都盛傳梁培華會過嚟香港做富邦香港揸弗人。雖然富邦啲公關姐姐話，新委任事宜將會喺獲得有關監管機構批准後公布，不過絲絲相信公布嘅日子好快就到，因為李晉頤今年底就會正式退休，為保交接順利，估計人選都會喺佢退休前入富邦香港適應一下。
梁培華係母公司嗰邊富邦行銷、運彩科技嘅法人董事代表，最近亦已卸任，同時亦已搵到繼任人，所以外間相信，佢好快就會確定接任富邦香港董事總經理兼行政總裁。
李晉頤52歲就有得提早退休，好快就享清福，話唔定佢會返去台灣家鄉，到時咬住檳榔唱吓歌，生活應該幾寫意。
余絲韻