本文重點
滙豐真係多人事變動，絲絲今次講嘅都唔算係乜嘢新聞，因為早喺滙豐公布高層大執位之前發生，主角係邊位？講個名未必個個識，但一講係袁天凡老婆，相信即刻好多人知道係邊位，咪就係Rose Lee（李慧敏）囉！佢早前已從滙豐企業銀行主管個崗位退下來，過去個多月有好多人同佢Farewell。
袁天凡太座 轉任顧問
Rose喺滙豐工作已有一段長時間，同客戶建立咗好好嘅關係，加上佢係一個人才，有豐富嘅企業銀行業務經驗，滙豐又點會咁易放佢走？所以Rose會以顧問身份繼續留喺滙豐幫霍嘉治手。
霍嘉治明年二月出任嘅職銜係個人理財及工商業務主席，好似同Rose專長嘅企業銀行扯唔上關係，不過呢個世界所謂一理通百理明，中小企都會變成大企啦！而且Rose喺銀行業打滾多年，憑佢嘅閱歷，絕對會係一個好顧問，必定可以幫上忙。至於Rose原來嘅職位就由廖哲伶接替。
其實喺Rose未退休前，絲絲都成日聽人講，「如果我係袁天凡老婆，都唔使做啦」，但眼見Rose咁多年都喺滙豐默默耕耘，絲絲就覺得今時今日做女人，最緊要自己夠實力，自己賺自己錢，唔係好似一般女子咁膚淺，吓吓諗住靠老公養。
余絲韻