大市回調得幾日，當歐美股市一反彈，恒指即時有反應，昨日回升番382點。
今次大市反彈，除咗指數有反應外，唔少股仔尋日都表現唔錯，過去幾個禮拜，雖然大市鑊氣好薄弱，但啲股仔喺無成交之下插水，睇來好多大戶都走唔切貨，唔排除市場氣氛轉好後，班大戶會從低位炒番上去，隨時有第二春都唔出奇。
早前內地一句關水喉，唔少內房股應聲插水，過去數月，內地房價未見大跌，樓價依然企穩，沿海家園（01124）本身係二、三線內房股，早前跟隨一眾內房股由高位回落咗近三成，近期股價已見於0.6元有支持，股價落後，隨時追回早前跌幅，尋日見靜靜地起革命，不妨考慮上車，向上睇0.8元，止蝕放於0.58元。
古晨