過去十年恒指十月份平均回報0.39%，最差係九月份負2.67%。呢個數據唔全面，要進一步睇風險情況。「標準差」係統計學概念，又用嚟量度投資風險，標準差愈大，風險愈高。十月份標準差最高，即係十月份入市要冒最大風險。

我哋試將以上資料形象化，以下技巧中學都有教，篇幅有限唔講當中理論。總之記住將平均值加或減一個標準差，得出上限和下限兩個數字，可以預期有68%數據喺呢個範圍內，如果加減兩個標準差就約有98%。

九月入市風險大

即係話按過去十年數據估計，十月份恒指回報有68%機會介乎負9.89%（0.34%-10.23%）至正10.57%（0.34%+10.23%），即係十年有大約七年回報介乎以上範圍。或者四月份係最好投資月，因為上限係最高的12.88%，但下限唔係最低，都有負5.09%，至低嘅係九月份負11.25%。有人博賺多啲，有人寧穩陣唔怕賺少啲，留畀你自己決定。

如果比較冒同等風險下得到嘅回報，即係夏普比率（Sharpe Ratio）愈高愈好，十一月最好，有0.47%，九月份最差，為負0.31%，睇嚟九月份真係唔多值得入市。

金融海嘯後好多人都對數學同統計學有百般質疑，有本書叫《The（Mis）behavior of Markets》就係提出金融學所有嘅統計學假設係錯得離譜。

大健