65%散戶估失守二萬關

家陣魚缸戰友睇淡居多，因為A股要等到本周五先「開爐」，依家又係「赤色十月」，睇番多個股災年嘅港股十月表現，「八七股災」瀉43%、「九七金融風暴」跌29%，去年又應驗咗十月跌市命運，跌咗成22%，唔怪得股友一到十月就腳震，唔敢瞓身住。今期《東方產經》網上民意調查問大家點睇港股十月表現，截至上周末晚上6時，35.3%股友估恒指可企穩2萬點樓上，話會跌穿2萬點或以下就高近65%。

凡事總有例外，跌市一樣有人發到「意外財」，其中一位表表者係「黑天鵝學派教主」塔利布（Nassim Nicholas Taleb），佢現職大學教授，有自己管理嘅基金，專門喺個市突然出現大事件下贏大錢，如喺「九一一」以及去年秋天就買入價外認沽期權獲利。佢寫嗰本《黑天鵝效應》令佢聲名大噪，成為○七年全球最暢銷書籍之一，現已翻譯成31種語言。

洞悉危機「無招勝有招」

簡單嚟講，呢本書提醒投資者「危機永遠存在」，總有啲事「估你唔到」。話說以前歐洲人認為世上只有白天鵝，直到澳洲出現黑天鵝後，便推翻「所有天鵝都係白色」嘅想法。

書中有一句話我覺得好啱股友參考：「當你認為自己嘅分析工具有效捕捉市場升浪時，呢個時候應該係要做淡個市，就算唔沽空都要減持股票；因為呢一刻，任何資產價格已被合理化，接下來可能係災難。」

孖妹好佩服呢位「黑天鵝教主」，佢投資時唔會用到複雜嘅數學模型，亦唔會靠某樣技術分析來決定入市，但又能賺個滿堂紅，真係「無招勝有招」。

「黑天鵝教主」上周嚟咗香港，我哋一早喺會場等佢，拎咗佢個簽名之餘，仲想知喺環球經濟復甦當前，佢減少咗危機感未。

莉莉︰ 雷曼「爆煲」後，你覺得股友知驚未？

塔利布︰ 市場充斥好多「病毒」，華府仲未識驚，救市措施只會延長痛苦期，美國結構性債務危機依然未除。

高妹︰ 你點睇香港嘅投資環境？

塔利布︰ 香港人有動力且努力不懈，加上外儲持續高企及政府債務偏低，證明香港金融市場穩健。

重提「教條」山雨欲來？

莉莉︰ 依家應該做啲乜嘢以應付下一個「黑天鵝」？

塔利布︰ 依家要好好裝備自己，包括「避開複雜嘅金融產品」、「信念要堅定，不應被市場上所謂嘅經濟學家動搖看法」以及「退休金不應靠金融專家」。

高妹︰ 呢啲「教條」今年初講過一次。

莉莉︰「唔理白貓黑貓，只要捉到老鼠就係好貓。」理論唔怕舊。

高妹： 我只係擔心重提「教條」，唔通「黑天鵝」會重臨？

莉莉：「黑天鵝」都有好有唔好嘅，講番今年好嘅「黑天鵝」，缸友認為係騰訊（00700）、玖紙（02689）及比亞迪（01211）。一口流利英語嘅散戶歐生話︰「今年最估唔到係雷曼迷債拎得番錢，自己投資十幾萬元，知道佢破產後都願賭服輸，上月初終收到本金嘅六成，簡直係『驟雨中的陽光』。對於後市，我絕對冇驚過，仲不斷入貨，等到明年二、三月先收割。」

不過，有時喺你最鬆懈之際，「黑天鵝」往往以0.0001%嘅機會出現。本周有7隻新股掛牌，唔知係好定壞，抽中嘅股友要識執生。順帶一提，今日係港交所首日透過供應商推出港股免費即時報價，大家快啲上on.cc體驗吓「即秒報價」啦！

莉莉

若有料報畀高妹同莉莉或有嘢問，可電郵money.biz@opg.com.hk