本文重點
蜆壳電器（00081）出售控股權畀中國海外（00688）嘅交易似乎幾多波折，早前就傳有另一中資機構想做程咬金同中海爭，結果最後中海都可成為最終買家，雖然中海已成為最終及唯一嘅買家，兼且同蜆壳大股東傾好價錢，不過作為一家上市公司，唔係大股東話賣就可以賣，始終要睇吓小股東嘅意願。
好似今次咁，喺中海出價嘅同時就已有「小」股東反對，呢位「小」股東唔係一般小股東，係蜆壳主席及董事總經理翁國基嘅胞弟翁國材，理論上係大股東嘅關連人士。
主席細佬不滿價低
呢位集團非執行董事就講明話中海出價太低，所以已向董事會表達佢嘅反對建議，並有意反對中海嘅收購。
根據蜆壳嘅公告，持有公司12.08%股權嘅翁媽媽表明支持收購建議，加埋佔股50.36%嘅翁國基，已有62.44%票數支持；不過翁國材都佔股8.33%，如果拉攏到其他股東，影響力絕對唔細，睇到呢度，絲絲不禁感慨近年啲大家族點解有咁多分歧？
余絲韻