本文重點
呢幾日台灣最忙嘅人除咗一班官員外，就應該要數到太電前董事長孫道存嘞，事關佢要四圍撲水，籌足1億元（新台幣‧下同）償還「首期」畀稅局，成功免除即時收監之苦。
半年清稅 女兒擔保
孫道存晨咁早就去咗搵執行官表示誠意，話同銀行傾掂可以調到錢，仲攞埋支票去還稅。不過，佢希望將剩低嘅2億欠稅分年半還，稅局就點都唔肯，雙方閂埋門拗咗成7粒鐘。聽講稅局搵咗高手去查孫道存，Check到佢有大批股票、現金及董事袍金，大嗱嗱成9億元流向有問題。
稅局就係揸住呢一點，逼到孫道存發晒老脾。如果分年半還錢，稅局要佢即刻收監，孫道存惟有死死氣應承半年內還清欠款，但佢都要由嫁咗入豪門嘅女兒孫芸芸做擔保至得，假如將來真係無錢還，稅局就可以追孫芸芸。兩億元都唔係少，每個月要還3,333萬㗎，睇嚟孫道存仲會有排忙。
余絲韻