大笨象（00005）早段係威係勢，一段高見92.65元，股價仲高過上周五ADR收市價，可惜後勁不繼，至下半場明顯腳軟，終倒跌0.2%散場，報收90.95元。祖國移動（00941）總客戶量突破5億，逆市靠穩，總算叻番次，報收78.4元，微升0.5%。至於藍色大隻佬升幅冠軍利豐（00494），多得「美人林」出吹水報告唱好，目標價調高至31元，刺激利豐逆市上升，一度高見30元，散場報收29.65，升逾7%。

缸邊友捧影子股

缸邊友愈來愈擔心北大人關水喉，紅色錢莊沽壓重重，同時缸邊友亦憂慮本地錢莊加按揭利率，本地地主腳軟，兩類股份沽壓較大。四叔基地（00012）跌逾3%，失守50元，其他本地地主至少跌1%。紅色錢莊以中行（03988）表現較曳，跌3.1%，六行中只有建行（00939）逆市靠穩，微升0.1%。

二三線股仔靜過鬼，口痕友話莊家唔敢做嘢，缸湖傳聞有個別莊家股被盯上，古勝烏卜卜，反而認為係無鑊鏟友參與，自然係水盡鵝飛。新丁輪流登場，股仔無得玩，缸邊友轉投影子股懷抱，永利澳門（01128）加碼集資，周四開始IPO，昨日搞「路騷」，帶動一眾濠賭股落鑊，個別濠賭股更錄得一成升幅。既然影子股有睇頭，在下建議亞洲水泥（00743），皆因華潤水泥（01313）已於昨日開始招股，相信對在魚缸的水泥股有刺激。

華潤水泥在國際配售反應熱烈，古勝收到風，昨日IPO的初步反應極佳，一眾影子股理應落鑊炒番轉。可能看官會質疑，買股要買龍頭股，點解在下唔揀安徽海螺水泥（00914），不過是相對亞洲水泥極為落後，以其資產淨值推算，現價有條件翻一番。

亞泥成績表見得人，主要業務從事開採與產銷水泥及混凝土產品，○八年度截至十二月底止，盈利勁升67%，○九年上半年盈利更同比增89%至3.24億元人仔，進度非常理想。由於業績表現極佳，綜合大行的今年預測盈利增長高達95%，即每股盈利折合0.583港元，現價預測市盈率只有8.8倍。

市盈率相對偏低

睇番其他水泥股，海螺跟台泥（01136），預測市盈率分別為26.1倍及18.6倍，近日登場的新丁金隅（02009），預測PE更高達34.7倍，平均計算，上述幾件水泥股的預測PE達24.9倍。如果亞泥追番近，股價有本事翻一番。

亞泥市帳率（PB）亦較同業低，截至○八年底，亞泥NAV每股折合約4.72港元，現價PB只有1.09倍，同業平均PB超過兩倍，亞泥又多個理由股價升一倍。古勝打番個八折，亞泥亦要見8元。

古勝