繼上次拍賣場出現成功賣出一半業權住宅單位後，忠誠拍賣行拍賣部總經理鄭世傑話，本周將會有一個兆康苑D座高層3室，透過法院令推出拍賣，單位面積526方呎，自由市場開價64萬元，低市價約40%，呎價只係1,217元。鄭生話，由於個單位賣方只提供單位部分樓契，所有新買家搵銀行做按揭，抑或日後轉手都可能會有困難。

連鎖食品店買舖搶攻

市區地舖租金不斷上升，有商戶為長遠計，揀啱靚舖就自置作長遠發展。Vincent收到風，開業已經18年嘅連鎖食品店「佳寶」，早前買咗牛頭角一個雙地舖王，除銳意提高區內嘅市場佔有率外，並計劃陸續以全新裝飾及間隔等新形象出現。聽講，佳寶今年已經開咗多間新店，現時佳寶分店已達64間，以全港19區計，即係每區最少有3間。

（Vincent Lau）