勁挾殺倉唔合邏輯

每逢有大批牛熊證被收回，總會有專家話係因發行商挾個市殺牛熊證，呢啲陰謀論我曾經信到十足，但依家開始轉變。

牛熊證發行商有成14間，競爭咁大，倉位又各有不同，係咪會咁齊心殺散戶呢？就算真係咁團結，或者唔想阻行家搵食，甚至無形之手令大家行動一致，但以規模同可動用資金嚟計，發行商喺市場只算小戶，仲有大把實力雄厚、規模更大嘅「大鱷」，發行商係咪有咁大力量？

無可否認牛熊證被收回，發行商即刻賺晒財務費用，所以如果隻牛熊證賣得好，真係愈快收回愈好。計吓數，上周五開市前收回價由21,200至22,399點嘅恒指熊證有約6.88億份街貨，呢批街貨嘅溢價總值約146萬元，即係若呢批熊證被收回，發行商大概賺百多萬元。上周恒指收報21,161點，若要挾千幾點到22,399點，我估無幾十億元好難成事。唔係啩？幾十億去博百幾萬，仲要唔係贏硬喎！

差幾十點或踩多腳

有人話買牛熊證等於打開牌同發行商對賭，正常情況下發行商賣出牛熊證後就會做對沖，例如賣咗恒指熊證就要沽期指，只求賺財務費用，唔係同散戶對賭。當然發行商唔會百分之百做足對沖，但投資銀行嘅風險管理好嚴格，唔會容許交易員任意坐盤，就算賭方向都有個譜。

所以話發行商挾恒指幾百點去殺倉機會未必咁大，但如果差幾十點，會否加多腳就唔敢包。

（大健）