熱捧比亞迪雅居樂

當時見到好多人議論紛紛，場面好熱鬧，原來荷銀Ivan（荷銀股票衍生工具及私人投資產品部董事何啟聰）同佢嘅拍檔阿Bill落咗嚟，自然好多人爭住問貼士。近排股友最熱炒嘅股仔，自然包括比亞迪股份（01211），因為佢被納入國指成分股，本周有機會破位而上，所以啲股友仲係實，揸住嘅當然唔放住。

天行聯合證券觀塘分行經理吳家邦話，除咗比亞迪，好多散戶睇雅居樂（03383）嘅中期業績「靚仔」，加上呢排內房股旺番，所以會再追雅居樂；另外，跌完一輪嘅電力股依家估值吸引，其中華潤電力（00836）嘅售電量增加，係一隻幾硬淨嘅股仔。

對於成個市，啲散戶都唔太樂觀，所以啲恒指「熊仔」愈來愈多人留意。

（莉莉）