中獎贏黃金全投股海
時間過得真快，聽日就係金融海嘯一周年嘅大日子，早幾日雷曼兄弟前總裁富爾德（Richard Fuld）又突然開腔話：「一周年快來了，我曾經被人連環重擊、唾罵，相信今年九月十五日，我又會被揪出來臭罵一頓。」唉，真係唔知佢算係「攞景定係贈興」？
講咗咁耐，我都唔記得自我介紹。各位股友，以後喺呢個缸湖版就會見到我高妹同拍檔莉莉嘅可愛兼醒目樣。我哋每周都會走訪唔同地區嘅證券行，務求發掘最勁嘅魚缸熱料爆畀大家聽。
唔知大家仲記唔記得，去年臨近雷曼「爆煲」前，個市開始變靜，即係大風雨前夕。嗰時耀才證券可能想令啲客Trade多啲，於是搞咗個抽獎。今期就多得耀才證券總經理陳啟峰仗義幫忙，搵到當日其中一位幸運散戶倪明，原來佢好好彩，喺去年九月抽中獎，攞到耀才送出嘅黃金禮券大獎，佢將30萬元黃金禮券換咗金飾之後，再將金飾變賣作為炒股資本，當時正值金融海嘯爆發，咁咪……
唔揸過夜 埋單賺30%
莉莉：倪明，去年你一注獨得30萬元黃金，最後你將啲錢買咗乜嘢呀？
倪明：我一收到禮券，就去金行買咗啲金飾，不過唔夠一陣，我就將金飾賣番畀金行，蝕少少差價，換番28萬元現金用嚟炒股。
高妹：金融海嘯喎，你咁大膽將28萬現金掟落波濤洶湧嘅股海中，唔通你玩股票好叻？
倪明：唔係呀，見到華府唔救雷曼，初時個市係咁冧，都輸咗少少錢，但我唔會持貨過夜，無論隻股票蝕賺我都會放。其實我玩咗股票只有3年時間，一開始玩都要蝕錢，我足足交咗半年學費㗎。
莉莉：話時話，嗰28萬Cash有無幫你將資本愈滾愈大先？
倪明：幫我贏得最多錢嘅主要係窩輪同期貨。過去一年，用28萬賺咗約30%利潤，即係約84,000元，當中主要投資滙控（00005）、中移（00941）嘅股票及窩輪。
高妹：海嘯喎，算係咁喇！諗番轉頭，就算你無放到啲金飾，淨係揸住，依家都賺咗13.96%，真係無本生利。睇嚟金融海嘯對你無乜大影響喎。
倪明：你錯喇，雖然我喺投資上無蝕到錢，但我去年大學畢業，金融海嘯累我用咗兩個月時間都搵唔到一份工，於是我惟有再讀多一年Master。依家我希望明年市況會再轉好啲，到時可搵番份好工。
高妹：其實你想做乜嘢工作？
倪明：我自己讀精算兼金融出身，希望畢業後做交易員或分析師。
莉莉：相信金融海嘯好快就會過去，到時你一定會見到彩虹，搵到一份好工嘅。
60％股友至今仍輸錢
同倪明傾完偈後，我真係好羨慕佢有幸運之神眷顧，無本生利賺唔少，但部分股友就唔係咁好彩啦。今次《東方產經》網上民意調查就問各位股友，金融海嘯將近一周年，股友們嘅股票投資成績如何呢？截至上周末晚上6時，60%人話仍然虧蝕，話已收復失地嘅只有12%，反敗為勝嘅就有28%。
呢次突如其來嘅「海嘯」真係令唔少人輸身家！不過，觀塘天行聯合證券散戶歐生都算好彩，佢話：「恒指由32,000點高位跌落嚟，我都係由五月開始先至賺番之前輸嘅八、九成錢。」
「同是天涯淪落人，在這傷心者通道上同行」（咳咳），唱住咁多先，雖然金融海嘯未足以令我同莉莉蝕入肉，不過我哋真係好耐無買過新衫喇。
講番轉頭，我覺得金融海嘯某程度已成為香港人嘅集體回憶，即使聽日富爾德真係又再畀人連環重擊，其實都唔再重要，我哋只想由明天開始，股友可以快啲見到恒指重上32,000點水平，大家笑臉重現。
（高妹）