上證回升，港股做好，唔少股仔又再現鑊氣，雖然力度同八月份仲相差好遠，但經過調整後，好多股仔走勢健康咗，其實只要大市唔係大死，相信啲股票都係反覆向上居多，始終低息環境下，資產有價，唔炒股唔炒樓都無咩好投資。
其實股價上上落落，好多時係睇間公司賺唔賺到錢，賺到錢有錢分，股價自然水漲船高，古晨最近就留意到隻眾彩（08156），走勢突然好勇猛，八月中大市開始轉差，但眾彩就鬼咁神勇，令人摸不着頭腦，謎底上個禮拜五終於解開，眾彩早前成功出售天然氣業務，所以業績有望轉虧為盈兼發盈喜，難怪近期咁鬼旺場。古晨再細心一查，仲發覺高盛七月份曾經增持咗9,676萬股，持股量增加至7.68%，連大行都身體力行，一於博佢炒業績爆上1元，最多跌穿0.5元才作止蝕。
古晨