太電前舵手破產欠稅

呢件事嘅主角，就係5年前驚爆被前任財務長掏空公司171億元（新台幣‧下同）嘅太平洋電線電纜公司前董事長孫道存嘞。兩年前仲傳佢身邊女友好似走馬燈咁轉，依舊鍾意蒲夜店，生活多姿多采；幾個月前佢仲娶咗身材高挑，只有28歲嘅「嬌」妻添。

多情係一回事，但仲欠稅局3億元欠稅嘅佢，就頻頻畀人影到佢拖住老婆去名店購物嘅相。佢有豪華轎車代步，住緊值3億元、近萬呎嘅大屋，咁富貴點解唔還錢？間公司畀人呃清光，揸住太電股票變廢紙嘅小股東梗係火都嚟埋，咁仲有公理嘅？

呢件事已經引起公憤，聽講司法院打算喺破產法增訂「禁奢條款」，主要係參考香港嘅做法，限制破產人士不能過奢華生活。係就係遲得滯，但總好過乜都唔做嘅。

余絲韻