本文重點
上市公司每年公布業績時，以食品及紀念品招待股東唔係乜嘢新鮮事，不過尋日中糧控股（00606）就搞搞新意思，向股東、分析員及記者每人派一包5公斤裝嘅大米，要啲人拎咁重嘅嘢咪好辛苦？放心喎，事關佢哋係派米券，受惠嘅人可以憑券去華潤超市換購中糧佢哋嘅自家品牌「金盈稻花香」米。
宣傳旗下東北靚米
中糧話呢隻米係產自東北，品質勝過專門用嚟出口嘅米，今次派米一嚟可以畀啲股東同老友試吓佢哋嘅產品有幾咁好，同時又可以回饋股東。絲絲心諗，仲可以做埋試食廣告添，實在係一舉多得。
絲絲未試過中糧呢隻米，但聽到話產自東北，就肯定唔會差得去邊。事關東北出名土地肥沃，喺佢哋黑土地上種出嚟嘅米黏度好高，煮出嚟嘅飯好似有一層油喺面咁「立立令」，可以媲美日本珍珠米，所以都有唔少係出口去日本，仲要係價錢比日本米相宜，所以如果去東北旅行，都不忘會買包米返嚟玩吓煮飯仔㗎。
余絲韻