月尾喺馬會大搞歡送

絲絲收到風，個歡送會將選址喺馬會舉行，唔知同任總鍾意做馬主有無關係呢？更加令絲絲期待嘅係，除咗一眾金管局同僚聚首一堂，如果任總拉住愛駒「自己友」出嚟，就真係同班同事襯到絕，因為大家都係「自己友」，當然，佢嘅退役名駒「有錢賺」同「威將名駒」都一樣咁夾。

其實任總喺金管局最後一個月，真係可能忙到有飯都無時間食。因為太多歡送會太多應酬，任總嘅市場地位咁高，財金界有分量嘅高層都會想同佢食餐飯敍舊歡送，上咗菜都要繼續傾偈，真係未必得閒食嘢。

做16年髮白似楊過？

話說任總「法定出生日」雖然係一九四八年九月九日，但多年前佢講過佢由內地嚟香港時，潮流興報細數，所以喺一九四七年出世嘅佢就報細咗一年。絲絲屈指一算，肖豬嘅任總已經62歲，到咗耳順之年，但其中有16年都奉獻咗畀金管局。任總做咗16年做到頭都白埋，絲絲諗起，咁啱楊過等小龍女又係等咗16年等到頭髮都白埋，唔通16年諗埋同一樣嘢，真係會變成「白頭佬」？

余絲韻