早排內地傳會「閂水喉」，上證大插，暴跌近三成，港股無奈陪跌，不過大戶亦唔係省油嘅燈，自上周四起，大戶積極部署挾淡倉，四日內挾足千六點，今次班大戶真係飽到漏。雖然恒指重返高位，可惜唔少股仔個價仲係唔見咗一大截，尋日個市再升四百幾點，唔少股仔已經見抽高後再派發，最終仲要倒跌收場，唔通大市今次又係做「彈散」？
大市走勢，古晨真係唔識估，就算估亦唔慌會中。但既然大市四日內反彈咗咁多，而啲股仔又無乜力水，咁不如轉玩啲防守性強嘅股份，好似隻江蘇寧滬高速（00177），本身收益夠穩定，最重要係孳息率有成四厘七，真係好過銀行息口多多聲。近期股價6蚊有支持，不妨小注吸納，上望7.5元，止蝕就放番5.8元。
古晨