昨日港股受美股跌勢拖累，一度跌穿50日線，雖然內地股市靠穩，但睇番上證指數都只係微升31點，似乎有啲自身難保之感。恒指最終暫穩守於50日線上，收報19,522點，跌350點，成交就只得533億元。
內地消息方面，內地八月製造業採購經理指數（PMI）為54，創十六個月新高，更連續六個月位於盛衰分界線之上，雖然製造業有復甦迹象，但亦都加重通脹嘅問題。不過，溫總又再大派定心丸，話國家經濟處於企穩回升嘅關鍵階段，政策方向不變。
另外，溫總一而再，再而三咁強調，會繼續實行積極財政政策及適度寬鬆的貨幣政策，俗語都有話「講得多都變真」，唔知佢不厭其煩咁講呢番說話，會唔會有一啲實質行動跟尾呢？
（小尾）