美股終於要倒下，詩詩相信九月份唔慌有運行，恒指暫險守19,500點，四叔話齋，等個市再落些少先買貨。國美電器（00493）前日勁彈後，尋日又隨大市回軟，詩詩無眼睇，繼續持有。至於短炒駿威（00203）唔夠水位食胡，揸多一兩日，個市反彈實有機會甩身。
富士康國際（02038）是昨日少數逆市上升股份，唔排除在現水平已找到支持。集團剛公布以2.2億元出售手機製造公司，睇嚟市場對呢個消息反應頗為正面。富士康已公布截至今年六月底止中期業績，由盈轉虧，錄得虧損1,870萬美元。業績公布後，高盛表示維持其中性投資評級，○九年每股盈利因應集團曾發盈警，下調40.1%，不過目標價卻從3.8元調高至5.4元。富士康的手機定價環境仍困難，但集團的成本控制卻相當成功，經營開支大幅減少三成，所以邊際利潤可維持在1%。
由於富士康出售了手機製造公司，料業務重組陸續有來，對集團控制成本及提高效率方面有莫大幫助，投資者應扭轉前景過淡的睇法。而在3G的商機處處下，料富士康亦可受惠。
詩詩