中行台聘帥要求高

李禮輝帶團去台灣考察，真係一舉兩得，工作探親兩頭忙。聽講佢本月又會帶團去台灣，不過要同當地金管會見面，並與同行傾吓合作大計，仲要睇埋當地法律情況，隨時飯都唔得閒食，睇嚟未必有時間探親喇。

中行準備喺台灣開分店，已經要請人，條件就係負責人要係銀行業專家、有高管理水平、有國際金融實踐經驗、了解當地風俗文化、識講閩南話及台語，絲絲見唔少銀行家，第一時間諗到嘅合適人選就係李禮輝，問題就係李行長有無可能分身呢？

中銀香港張雙幣卡喺香港賣到咁勁，一張卡度度通行已經係大趨勢，李禮輝亦話時機成熟時，中行會喺台灣發行自己嘅信用卡及銀行卡，絲絲估計，一卡雙幣唔使好耐一樣會席捲台灣。

余絲韻