本文重點
中國生命（08296）將會係香港首間做殯儀嘅上市公司，業務獨特之餘，估唔到連上市嘅日期都好特別。佢哋揀咗尋日見記者，絲絲睇番個日曆，原來尋日咁蹺係農曆七月十四（又稱鬼節），揀呢日開記招都幾有噱頭，但原來主席劉添財唔係專登揀尋日開記招，只係咁啱得咁蹺。
好多人對殯儀業務相當好奇，即使公司嘅配售已一早截晒飛，但尋日記招仍吸引到唔少傳媒採訪。劉總見到咁多傳媒到場，即使喉嚨唔係咁舒服，佢一樣好有心機向大家講解殯儀業嘅運作，而且仲一貫台灣人客氣嘅作風，每逢女記者發問，佢都會話多謝「美女」或「靚女」嘅提問。
劉總上市日紀念母親
不過，公司喺下周三（九月九日）上市就真係有特別原因，原來呢日係劉總母親嘅死忌，所以佢專登揀呢日上市作為紀念母親咁話，聽講劉總為上市日子相當緊張，務求做到無任何差錯，以免影響到公司喺呢日上市。
余絲韻