本文重點
貿易通（00536）行政總裁余國雄將於年底正式榮休，喺中證監做過顧問嘅證監會前高層吳偉聰將接棒，下月返工做候任CEO。余國雄尋日話都要有3個月嘅交接期，等佢將業務交帶吓，絲絲問佢會唔會將所有功力傳畀新CEO，佢笑住話自己得一招，比「人哋」少六招，所以無乜好傳，官場出身嘅佢，講起官場笑話果然特別醒神。除咗吳偉聰外，貿易通仲搵咗前衞生福利局局長周德熙做獨立非執行董事，班底真係強。
退休湊孫做義工
余國雄話早喺貿易通上市前已想退休，但當時上市保薦人話，公司一上市個CEO就走，好似唔係咁好，所以佢就做多陣，結果搞到今年底先走得。退休後有乜搞作？佢話除咗湊孫，亦會諗做義工，當然仲有養馬同炒股。佢同朋友合養嘅馬匹「十足十」將於十一月左右出賽；至於股票，佢就偏愛銀行股，除咗三大內銀股，仲有滙控（00005），佢話舊年供咗股後，喺60幾蚊時仲有加注，帳面利潤都幾和味。
余絲韻