本文重點
點解會有班西裝友喺皇后像廣場打Boxing？呢班全部都係中環返工嘅「賓卡」及金融才俊，原來佢哋參加咗Hedge Fund Fight Nite慈善活動，要接受5個月訓練學打Boxing，然後上擂台為慈善團體籌款。金融海嘯會唔會影響籌款？有中環老友笑話冇有怕，皆因「海嘯」後不知幾多人想睇啲i-banker畀人打呀，今次仲唔銷情爆燈？
5個月速學 10‧29開戰
不過，上擂台之前都要過五關斬六將㗎，皆因呢個比賽係淘汰制，參賽者有44位，經幾輪篩選後，家陣得番20人，不過最終只有12人可參加下月嘅比賽。所以呢班才俊個個都勤加練習，好似做緊私人銀行財富管理嘅夏志禮咁，佢喺英國時已聽過呢個活動，雖然大會只係安排每星期訓練兩次，佢就自己加操至5次，務求出到線，仲話會Call齊朋友嚟幫自己打氣添！
比賽喺十月廿九日舉行，到時會有800位支持者到場打氣，門票現已公開發售，每枱12位晚餐萬八元起。去年大會籌到約100萬元，今年銷情係咪真係會升呢？
余絲韻